Ақтөбеде есірткі притондарымен күрес жалғасып жатыр: 12 нашақор мәжбүрлі емге жіберілді

Ақтөбе қаласында полицейлер есірткі қылмысына қатысты тексеру жүргізіп жатыр, деп хабарлайды Azattyq Rýhy.

Полиция көпқабатты үйлердің қабырғаларына жазылған 44 нарко-граффитиді анықтап, есірткі затын жарнамалау дерегі бойынша 27 қылмыстық іс қозғады. Қазіргі таңда тергеп-тексеру жүріп жатыр. 

«Учаскелік инспекторлар үй аралау барысында маскүнемдер мен нашақорлар жиналатын притондар ұйымдастыруға үй-жайларын берген 2 пәтер иесін анықтап, оларға қылмыстық іс қозғалды. Притондарда жиналып, есірткі затын қолданған 12 нашақор мәжбүрлі түрде емдеу мекемесіне жолданды, 139 адам ішкі істер органдарының «нашақор» есебіне қойылды», – делінген облыстық ПД хабарламасында.

«Учаске» ЖПІШ барысында пәтер ішінде немесе үй жайларда (қоғамдық орынға жатпайтын) есірткі затын қолданған 224 адам әкімшілік жазаға тартылды.

Естеріңізге салай кетейік, «Учаске» іс-шарасы Ақтөбе қаласының аумағында 1 қыркүйектен бері жалғасып жатыр.