Көкшетауда өрттен зардап шеккен үш баланың бірі көз жұмды

Көкшетауда 13 маусым күні түнде көпқабатты үйден шыққан өрт салдарынан бір үйдің үш баласы ауыр халде ауруханаға жеткізілгенін хабарлаған болатынбыз. Таңертең сәбилердің кішісі көз жұмды деп хабарлады облыстық аурухананың мамандары.

Оқиға Сарыарқа шағынауданындағы 5 қабатты үйлердің бірінде болған. Балалардың ата-анасы қазалы үйге кетіп, 3 сәбиді 21 жастағы әпкесінің жанына тастап кетіпті. Бойжеткен қыз дүкенге шыққан сәтте үйде өрт тұтанған. Балалардың екеуін көршілер алып шықса, 5 жасар қызды өрт сөндірушілер тауып, дәрігерлерге берген.

«Сағат 22.41-де 103 жедел жәрдем нөміріне Сарыарқа шағын ауданынан телефон шалынды. Өрт болып, үш бала аса ауыр жағдайда екені айтылды. Жедел жәрдем көлігімен екі бала 23.09-да Ақмола облысының балалар ауруханасына жеткізілді. 2010 жылы және 2013 жылы туған балалар 3-4-ші дәрежелі термиялық күйікпен түсті, денесінің 80-90 пайыз күйік шалған. Таңертең балалардың жағдайы одан сайын ауырлаған. Өміріне қауіп төніп тұр. Қазір ЖВӨ аппаратымен жатыр», - деді дәрігерлер.

Ал, 2015 жылы туған қыз баланың жағдайы тым мүшкіл болған. Оның денесінің 90 пайыздан астамын күйік шалған. Таңертең сәби көз жұмыпты.

«5 жасар қыз клиникалық өлім жағдайында жеке көлікпен жеткізілді. Үш балаға да реанимациялық шаралар жасалды. Өкінішке қарай, 2015 жылы туған қыз бала жаңа ғана қайтыс болды», - деп мәлімдеді облыстық аурухананың жансақтау бөлімінің дәрігерлер.

Айта кетейік, өртенген үйден 35 адам қауіпсіз жерге шығарылған. Өрттің неден тұтанғаны әзірге белгісіз, оқиға орнына жедел келген ТЖД мамандары тілсіз жауды небәрі 4 минутта сөндіргенін айтты. Зардап шеккен үш баланың екеуін көршілері далаға алып шықса, үшіншісін жанып жатқан пәтер ішінен өрт сөндірушілер тауып алған.