ҚМА Перизат Қайрат пен анасының қулығын әшкере етті – олар 3,5 млрд теңгеге шалқып өмір сүрген (ВИДЕО)

Бүгін Қаржы мониторинг агенттігі блогер Перизат Қайрат пен оның анасы Ғайни Алашбаевақа қатысты тағы қандай айып тағылып отырғанын жария етті, деп хабьарлайды Azattyq Rýhy.

Дереккөзге сүйенсек, 14 наурыз күні олардың әрекеттері қайта сараланған. Осы іс бойынша ұрланған ақшаның көлемі бұрын айтылған 1,5 млрд теңгеден 3,5 млрд теңгеге өскен. Бүгінгі ақпараты арқылы Қаржы мониторинг агенттігі Перизат Қайрат ақшаны қалай жылыстатқанын көрсеткен.

«Перизат Қайрат 2021-2024 жылдар аралығында қайырымдылық жасау үшін халықтан көп рет ақша жинауға шақырған. Ол бұл қаражат мұқтаж балаларға, Палестина еліне және су тасқынынан зардап шеккендерге көмек көрсету үшін жұмсалады деп айтқан. Перизат Қайрат «Biz Birgemiz Qazaqstan 2030» қорына түскен қаражатты өзінің шотына және анасы Ғайни Алашбаеваның есепшоттарына аударып алған. Артынан ол ақшаға зергерлік бұйымдар, киім-кешек, жиһаз сатып алып, саяхаттаған, өзге де шығындарын жапқан», - деп хабарлайды ҚМА.

Осы істегі нақты даталар мен сомаларды жария еткен ҚМА ресми өкілі Перизат Қайрат ең көп қаржыны былтырғы су тасқынынан «тапқанын» айтып отыр.

«2024 жылы 1 сәуір мен 15 қараша аралығында Перизат Қайрат су тасқынынан зардап шеккендерге көмек көрсету мақсатында «Biz Birgemiz Qazaqstan 2030» ҚҚ-ның есепшотына 2,8 млрд теңге жинап, оны жымқырған. Қылмыстық табысты жымқыру мақсатында ол темір киіз үй, қайық, етік және су тасқынынан қорғануға қажетті өзге де заттар сатып алдым деген желеумен 16 серіктес жеке кәсіпкерлермен келісімшарт жасасқан. Алайда бұл келісімдер іс жүзінде орындалмаған. Осылайша, миллиард теңгеден астам қаражатты қолма-қол ақшаға айналдырып, жеке мақсаттарына жұмсаған. Осы соманың 72 млн теңгесі оның анасы ҒайниАлашбаеваның есепшотына «Солтүстік Қазақстан облысындағы зардап шеккен тұрғындарға тұрмыстық техника сатып алу» деген сылтаумен аударылған, кейін ол ақшаны Перизат Қайрат шешіп алған. Осы ақшаға құны 6,9 млн теңге болатын «Rolex» сағатын сатып алған», - дейді ҚМА ресми өкілі.

Перизат Қайрат бұл схеманы баяғыдан қолданған тәрізді. Өйткені, 2024 жылдың қаңтарында ол  Палестина елі үшін қайырымдылық акциясын ашып, біраз ақша жинаған. Бірақ, ақшаны ол жаққа аудармай, өзіне бизнес сатып алған.

«Жиналған ақшаның бір бөлігіне 2024 жылдың қаңтарында «Rebel flowers» ЖШС-ін сатып алған. Бизнестің құны 23 млн теңге болса да, ол келісім-шартта күдік туғызбау үшін бизнесті 2 млн теңгеге сатып алдым деп көрсеткен. Бұл бизнесінің табысы 69 млн теңге болған. Ал, жалпы, Перизат Қайрат ұрлаған қаражатқа 4 автокөлік, 4 пәтер, 2 автотұрақ орнын, үй, жер телімі және ғимарат сатып алған», - деп хабарлайды ҚМА.

Сондай-ақ, блогер қымбат әшекей, аяқ киім мен сөмке сатып алуға 158 млн теңге жұмсаған көрінеді. Мүлкінің құны – 865 млн теңге.

Айта кетейік, Перизат Қайрат қазір қамауда отыр, ал, анасы үйқамақта.