«Зорлық-зомбылықты жарнамалау»: «Келінжанның» режиссеры оғаш видео жариялап, сынға қалды

Көпшілікке танымал «Келінжан» телесериалының продюсері Гүлнұр Мамасарипова таяқ жеп, көзі көгерген кейіпкерді жарнамалады, деп хабарлайды Azattyq Rýhy.

Ол әлеуметтік желідегі парақшасында телесериалда ерлі-зайыпты болып ойнайтын «Балқия» (Нұргүл Маңғытова) мен «Мәдібектің» (Назар Шархан) бір-біріне сүйсіне қараған видеосын жариялаған. Бірақ әйелдің көзін көгертіп қойған. Продюсер осылайша тұрмыстық зорлық-зомбылық көрген әйелді романтизациялағандай әсер қалдырады.

Желі қолданушылары арасында продюсердің қателігін байқағандар бар екен.

«Шаршаттыңдар, осындай көгерген көзды көруді, тұрмыстық зорлық-зомбылықты неге «нормаға» айналдырасыңдар? Сол күлкілі ме?» деп жазған желі қолданушысы.

«Көзіне не болған? Мәдөш пе?», «Мәдөш-ай, мынау не енді, Балқияның көзің көгертіп қойғансың ба?» деген пікірлер де бар.

Гүлнұр Мамасарипова осы видеоны салып, «Келінжан 3» шығуына 25 күн қалды деп көрерменнен сүйінші сұраған.