Ерболат Досаев лай көшкініне байланысты көшпелі кеңес өткізді

Алматы әкімі Ерболат Досаев топырақтың лайлануы сапдарынан болған техногендік сипаттағы лай көшкіні болған жерге келді, деп хабарлайды Azattyq Ruhy қалалық әкімдіктің баспасөз қызметіне сілтеме жасап.

Сол жерде қала басшысы бүлінген ғимараттарды аралап,  шұғыл көшпелі кеңес өткізді.

«Басты басымдық – іздеу-құтқару жұмыстары. Алдын ала ақпарат бойынша үйде тұратын адамдарды іздеу бойынша барлық жұмылдыру топтарының жұмысын үздіксіз қамтамасыз ету қажет», - деді Ерболат Досаев.

Көршілердің айтуынша, бұл үйде 4 адамнан тұратын отбасы болған.

«Әкімнің тапсырмасы бойынша болған оқиғаның себептерін тексеру және лай көшкіні салдарын жою бойынша арнайы топ құрылды», - делінген хабарламада.

Сағат 08:00-дегі жағдай бойынша іздеу-құтқару жұмыстары жалғасуда. Бұл жерде жедел медициналық көмек бригадалары бар.

«Ақпарат толықтырылады. Тек ресми деректерге сенуге шақырамыз», - деп ескертті әкімдік өкілдері.

Естеріңізге сала кетейік, 8 ақпанда Медеу ауданының «Тау Самалы» шағынауданындағы Олимпийская көшесі бойында техногендік сипаттағы топырақтың лайлануы салдарынан лай көшкіні болып, бір үйді толық басып қалған. Үйінді астында қалғандардың екеуі ересек, екеуі бала. Барлығы – бір отбасының адамдары.