ШҚО-да әкімнің мас жүргізушісі жол апатына ұшырады

Шығыс Қазақстан облысында әкімдіктің мас жүргізушісі көлігін шам бағанасына соқты, деп хабарлайды Azattyq Ruhy агенттігі YK-news-ке сілтеме жасап.

Катонқарағай аудандық сотының баспасөз қызметі хабарлағандай, 4 желтоқсанда ШҚО-дағы ауылдық округтердің бірінде әкім жүргізушісі мас күйінде жол-көлік оқиғасын жасаған.

«Ер адам тізгінге ие бола алмай, шам бағанасына соғылған. Жол-көлік оқиғасы салдарынан Катонқарағай ауылдық әкімдігіне материалдық шығын келді. Келтірген шығынды жүргізуші өз еркімен өтеді», - деп хабарлады жергілікті әкімдіктің баспасөз қызметі.

Сот жүргізушіні ҚР ӘҚБтК-нің 608-бабының 3-бөлігімен кінәлі деп танып, 20 тәулікке қамауға алу туралы үкім шығарды.

Сондай-ақ ер адам жеті жылға жүргізуші куәлігінен айырылды. Қаулы заңды күшіне енген жоқ.