Ақтөбе облысында жол апатынан зейнеткер әйел көз жұмды

Ақтөбе облысында жол-көлік оқиғасы салдарынан зейнеткер қаза тапты, деп хабарлайды Azattyq Ruhy.

Облыстық полиция департаментінің хабарлауынша, қайғылы оқиға 17 қазанда Байғанин ауданы Жарлы ауылынан екі шақырым жерде, Ақтөбе – Астрахань автожолында болған.

«Nissan X-Trail автокөлігі жол жиегіне аударылып кеткен. Көлік тізгінінде 28 жастағы қыз болған. Жол-көлік оқиғасы салдарынан жүргізуші мен 69 жастағы жолаушы әйел Байғанин ауданының орталық ауруханасына жатқызылды. Онда зейнеткер алған жарақатынан қайтыс болды», - делінген хабарламада.

ҚР Қылмыстық кодексінің 345-бабы 3-бөлігі бойынша сотқа дейінгі тергеп-тексеру басталды.