Алматы облысында автобусқа соғылған көлік жүргізушісі қаза тапты

Алматы облысында маршруттық автобус пен екі жеңіл көлік соқтығысып, соның салдарынан бір адам қаза тапты, деп хабарлайды Azattyq Ruhy.

Облыстық полиция департаменті атап өткендей, жантүршігерлік жол-көлік апаты 9 маусымда Еңбекшіқазақ ауданында болған. Жол апатына марқұм, Hyundai Getz көлігінің 34 жастағы жүргізушісі себепкер болған.

«Алматы – Көкпек – Көктал тасжолының 42 шақырымында қатты жылдамдықпен келе жатқан Hyundai Getz көлігі қарсы бағытта келе жатқан Saz Le-60 автобусына соғылып, өатты инерция салдарынан Hyundai Audi A4 көлігіне барып соғылған», - делінген ПД хабарламасында. 

Апат салдарынан Hyundai Getz жүргізушісі оқиға орнында қайтыс болды.

«Аталған дерек бойынша сараптамаларды тағайындалып, тергеп-тексеру жұмыстары жүргізіліп жатыр. Қазіргі кезде ҚР Қылмыстық кодексінің 345-бабының 3-бөлігі («Көлiк құралдарын басқаратын адамдардың абайсызда адам өлiмiне әкеп соққан жол қозғалысы немесе көлiк құралдарын пайдалану ережелерiн бұзуы») бойынша қылмыстық іс қозғалды», - делінген хабарламада.