СҚО-да адам саудасы бойынша халықаралық іздеуде жүрген шетелдік ұсталды

Апта бойы базарлар, құрылыс нысандары, фермерлік шаруашылықтар мен өзге де нысандар солтүстікқазақстандық полицейлердің ерекше назарында болды. Нәтижесінде СҚО полицейлері мемлекетаралық іздеуде жүрген шетел азаматын қолға түсірді. Бұл туралы Azattyq Rýhy Ішкі істер министрлігіне сілтеме жасап хабарлайды.

«Облыста «Нелегал — кордон» жедел-профилактикалық іс-шарасы өтті. Оның мақсаты тиісті құқықтық тәртіпті қамтамасыз ету, облыс аумағына заңсыз келетін адамдарды анықтау, заңсыз көші-қон арнасының жолын кесу.

Тексеріс нәтижесі бойынша 19 жұмыс беруші шетелдік жұмыс күшін пайдаланғаны үшін әкімшілік жауапкершілікке тартылды. Заңнаманы бұзғаны үшін басқа мемлекеттердің 44 азаматының болу мерзімі қысқартылды, 22-сі – елден тыс жерге шығарылды», - деп жазады министрлік.

Бұдан бөлек, төрт шетелдік ҚР Әкімшілік құқық бұзушылық туралы кодексінің 449-бабы (Қоғамдық орындарда тиісу) бойынша жауапқа тартылды.

«Барлығы жедел-профилактикалық іс-шара өткен кезеңде шетелдіктердің болу ережелерінің 250 бұзушылығы анықталды. 191 жағдайда ҚР азаматтары жауапкершілікке тартылғанын айта кеткен жөн. Қабылдаушы тұлғаның келетін иммигранттар туралы ішкі істер органдарына уақтылы хабардар етуін, келу құқығына тиісті құжаттарды ресімдеу бойынша шаралар қабылдауын еске саламыз. Бұдан бөлек, заңнаманы бұзып, ҚР-ға келетін шетелдікке немесе азаматтығы жоқ адамға тұрғын жай беруге заң тыйым салады. Барлық сұрақтар бойынша консультация алу үшін көші-қон қызметіне жүгінуді кеңес етеміз», - дейді СҚО ПД Көші-қон қызметі басқармасы бастығының міндетін атқарушы Ермек Нұсырбаев

Сондай-ақ іс-шара барысында үш қылмыскер ұсталды. Оның біреуі адам саудасы бойынша мемлекетаралық іздеуде болған. Ол СҚО Есіл ауданында заңнан жасырынып жүрген. Қазіргі уақытта қамаққа алынып, іздеу бастамашысына хабарлама жіберілді.