Ақтөбеде такси жүргізушісі есірткіге мас күйде көлік жүргізген
Ол жүргізуші куәлігінен жеті жылға айырылды
Ақтөбеде «Автобус» республикалық жедел алдын алу шарасы өтіп жатыр. Оның барысында көлікті есірткіге мас күйде жүргізген такси жүргізушісі анықталды, деп хабарлайды Azattyq Rýhy.
«Автобус» республикалық жедел алдын алу шарасы аясында 6 қазан күні сағат 10:30-да Заводская көшесінде полиция қызметкерлері «Яндекс.Такси» жүргізушісін тоқтатты. Жүргізушінің құжаттарын тексеру кезінде рейс алдындағы техникалық және медициналық тексеруден өтпегені анықталды. Сондай-ақ өзара әңгімелесу кезінде жүргізушінің жай-күйі тәртіп сақшысының күдігін тудырды. Тиісінше жүргізуші медициналық тексеріске жеткізіледі. Медициналық қорытындыға сәйкес, жүргізуші есірткілік мас күйде болған.
«Автокөлік арнайы тұраққа орналастырылды. Көлік құралын есірткілік мас күйінде басқарғаны үшін такси жүргізушісіне 7 жыл мерзімге рульге отыру құқығынан айыру және 15 тәулік мерзімге әкімшілік қамауға алу жазасы көзделді», - делінген облыстық ПД хабарламасында.
