Павлодарское ауылының маңында суға кеткен адамның денесі табылды
Ер адам 8 тамызда шомылуға тыйым салынған жерде суға батып кеткен
Павлодарское ауылының маңында суға кеткен адамның денесі табылды, деп хабарлайды Pavlodarnews.kz.
«Ер адамның денесі 12 тамызда сағат 13-41-де Павлодарское ауылында Ертіс өзенінің сағасынан табылып, жедел атқару жасағының күшімен судан шығарылды», - деді облыстық төтенше жағдайлар департаментінің баспасөз қызметінде.
Еске сала кетейік, Павлодар облысында демалыс күндері үш адам суға батып кеткен.
Қайғылы оқиғалар шомылуға арналмаған жерлерде болды.
8 тамыз күні сағат 17: 20-да Шаукен ауылының маңындағы сорғы станциясының жанында шомылу кезінде Ефремовка ауылының 30 жастағы тұрғыны суға батып кетті. Тағы бір жағдайда Май ауданында 7 тамыз күні Белая өзенінде Баскөл ауылында 44 жастағы Ақсу тұрғыны батып кетті. Сол күні Шарбақты ауданында Шалдай ауылының жанындағы жасанды су қоймасында 42 жастағы ауыл тұрғыны ажал құшты.
