«Бұл – Үкімет пен әкімдіктер үшін маңызды міндет»: Смайылов министрлер мен әкімдерге тапсырма берді

Премьер-министр Әлихан Смайылов Үкімет отырысында экономикалық көрсеткіштерді қамтамасыз ету жайлы айтты, деп хабарлайды Azattyq Ruhy.

«8 айдың қорытындысы бойынша экономиканың өсімі 4,9%-ті құрады.

Тұрақты экономикалық өсімге нақты сектор айтарлықтай үлес қосып отыр.

Тау-кен өнеркәсібі 4,3%-ке ұлғайды.

Бұл көрсеткіш мұнай өндіру көлемінің 6%-тен және табиғи газ өндірудің 3%-тен астам өсуі есебінен қамтамасыз етілді.

Өңдеу өнеркәсібінде 3%-тен жоғары өсім тіркелді. Машина жасауда 28%-тен, оның ішінде автомобиль жасау саласында 42%-тен астам орнықты өсім қалыптасты.

Сонымен қатар, өңдеу секторында жеңіл өнеркәсіп – шамамен 20%, резеңке және пластмасса бұйымдарын шығару – 7%-тен астам, дайын металл бұйымдары – 6%-тен жоғары, азық-түлік өнімдері – 4% және химия өнеркәсібі – 3%-тен астам жоғары өсу қарқынын көрсетті, - деді Премьер-министр. 

Құрылыс секторында – 11,4% тұрақты өсім қамтамасыз етілді. Шамамен 10 млн шаршы метр тұрғын үй пайдалануға берілді.

Қызмет көрсету саласында сауда – 10%-ке жуық, көлік – 7%-ке жуық және байланыс – 8%-тен астам ұлғайды», - деді ол.

Премьер атағандай, тау-кен өндіруді есепке алмағанда негізгі капиталға салынған инвестициялардың көлімі – 15,5%-ке өсті.

«8 айдың қорытындысы бойынша Батыс Қазақстан, Қостанай, Қызылорда, Солтүстік Қазақстан облыстарында, Алматы және Шымкент қалаларында барлық негізгі көрсеткіштердің өсімі тіркелді. Қалған өңірлер нысаналы көрсеткіштердің орындалуын қамтамасыз етуі тиіс. Қабылданған шаралардың арқасында тамыз айының қорытындысы бойынша инфляция 13,1%-ке дейін төмендеді. Мемлекеттік органдар мен өңір әкімдіктері азық-түлік тауарларына бағаны тұрақтандыру және тамақ өндірісін ынталандыру бойынша белсенді жұмысты жалғастыруы қажет», - деді ол.

Оның айтуынша, Мемлекет басшысы Жолдауда еліміздің экономикалық өсімін орта мерзімді кезеңде 6-7% деңгейінде қамтамасыз етуді тапсырды.

«Бұл – Үкімет пен әкімдіктер үшін маңызды міндет. Осы ретте, барлығымызға экономиканың негізгі бағыттарында және өңірлерде тиісті өсімді көрсету үшін тиімді шаралар қабылдауымыз керек.

Министрліктер мен өңірлер өздеріне қарайтын экономика салаларында ай сайынғы орнықты өсімді қамтамасыз етуі тиіс», - деді ол.

Авторы: Аягөз ҚҰРМАШ