2050 жылы электр энергиясының жартысы баламалы жолмен өндіріледі - Үкімет

Қазақстанда жаңартылатын көздерден электр энергиясын өндіру көлемі өсті. Бұл туралы Премьер-министр Асқар Маминнің төрағалығымен өткен Үкімет отырысында белгілі болды. Жаңартылатын энергия көздерін дамыту мәселелері қаралды, деп хабарлайды Azattyq Rýhy тілшісі.

Энергетика министрі Нұрлан Ноғаев, «KEGOC» электр желілерін басқару жөніндегі қазақстандық компания» АҚ басқарма төрағасы Бақытжан Қажиев, Алматы облысының әкімі Амандық Баталов, Жамбыл облысының әкімі Бердібек Сапарбаев, Қарағанды облысының әкімі Жеңіс Қасымбек баяндама жасады.

«Елдегі экологиялық жағдайды жақсарту – Президент қойған басым міндеттердің бірі. Экология мен қоршаған ортаны жақсарту құралдарының бірі – жаңартылатын энергия көздері. Осы саланы дамыту бойынша жүйелі жұмыс жүргізу қажет», - деді премьер.

2020 жылы Қазақстанда қуаттылығы 583 МВт болатын 25 ЖЭК нысаны, 10 жел, 1 гидро және 12 күн электр станциялары пайдалануға берілді. Жаңартылатын көздерден электр энергиясын өндіру 2019 жылмен салыстырғанда 74%-ға немесе 3,24 млрд кВтс-қа дейін (елде өндірілетін энергияның жалпы көлемінің 3%-ы) өсті. Биыл 381 МВт-қа 23 жоба іске асырылады – 13 ЖЭС, 5 ГЭС және 5 СЭС.

«Жасыл экономикаға» көшу бойынша ҚР-да іске асырылып жатқан тұжырымдамаға сәйкес, 2050 жылға қарай өндірілетін электр энергиясының жартысы баламалы энергетикадан болады. Бұл Қазақстан Республикасының төмен көміртекті және климаттық орнықты даму жөніндегі Париж келісімі шеңберіндегі міндеттемелерін орындауға, сондай-ақ жаһандық трендтерге сәйкес «жасыл энергетиканы» дамытуға мүмкіндік береді.

Қазақстанның бірыңғай энергия жүйесінің тұрақтылығын қамтамасыз ету үшін Үкімет басшысы Энергетика министрлігіне Экология министрлігімен және «KEGOC» АҚ-мен бірлесіп, электр энергиясының маневрлік генерациясын дамыту жөнінде ұсыныстар енгізуді, сондай-ақ ЖЭК жинақтауыштарын енгізу жөніндегі мәселелерді пысықтауды тапсырды.

Энергетика министрлігіне әкімдіктермен бірлесіп ЖЭК өңірлік аймақтарын құру мәселелерін пысықтау тапсырылды.

«Газ электр станцияларын іске қосу ЖЭК қосымша көлемін интеграциялау бойынша энергия жүйесінің мүмкіндігін ұлғайтуға мүмкіндік береді. Осыған байланысты Энергетика министрлігіне «KEGOC» АҚ-мен бірлесіп, 2022 жылдан бастап теңгерімдеуші нарықты нақты уақыт режимінде іске асыру бойынша жұмыс жүргізуді тапсырамын», - деді Асқар Мамин.