Ұлттық палата премьер-министрмен кездесуде бизнестің цифрлық картасы арқылы ТМК-ны дамытуды ұсынды

Премьер-министр Олжас Бектенов Қазақстанның тау-кен металлургия кешенін дамыту мәселелері бойынша Отандық кәсіпкерлер кеңесінің отырысын өткізді. Онда Мемлекет басшысының саланы дамыту жөнінде қойған міндеттерін жүзеге асыру барысы қаралды, деп хабарлайды Azattyq Rýhy.

Жиынға тау-кен өндіру және металлургия кәсіпорындарының басшылары, салалық қауымдастықтар өкілдері қатысты. Премьер-министр биыл тау-кен металлургия кешенінде (ТМК) мыңдаған жұмыс орынын құруға мүмкіндік беретін және экономиканы әртараптандыруға ықпал ететін 28 инвестициялық жоба жүзеге асырылып жатқанын атап өтті.

«Президент алдымызға өндіріс көлемін сақтап қана қоймай, сапалы өсуді қамтамасыз ету, ұзақмерзімді инвестициялар тарту сияқты стратегиялық міндет қойып отыр.Біз «шикізат өндіру және экспорттау» моделінен «ел ішінде қайта өңдеу және қосымша құн құруға» көшеміз. Үкімет ел ішінде қайта өңдеуді ынталандыру, жаңа өндірістерді қолдау, металлургиялық кластерлерді дамыту ісін жалғастырады», - деді Олжас Бектенов.

Өз кезегінде «Атамекен» ҚР ҰКП төралқа төрағасы Райымбек Баталов соңғы жылдары ТМК саласындағы мемлекет пен бизнестің бірлескен жұмысы нақты нәтижелер бергенін мәлімдеді.

«2029 жылға дейінгі ұлттық даму жоспарында саланың басымдықтары бекітілді, көмір химиясы және елішілік құндылық жөніндегі бастамалар қолдау тапты, жаңа Салық кодексіне ТМК бойынша түзетулер блогы енгізілді. Аталмыш қадамдар диалогтың жұмыс істейтінін растайды. Бұл ретте, ТМК секторындағы «Атамекен» жұмысы жаңа деңгейге шыққанын, атап айтқанда ТМК және елішілік құндылықты дамыту жөніндегі жобалық кеңсе құрылғанын, ол тек салалық қана емес, сонымен қатар, салааралық сараптама алаңына айналғанын атап өту маңызды. Осылайша, біз ірі бизнесті, шетелдік компаниялар мен ШОБ-ты ТМК-ға біріктірдік», - деді Райымбек Баталов.

Сонымен қатар, ҰКП төрағасы бизнес-қоғамдастық атынан «Атамекен» және сарапшылармен бірлесіп биылғы жылдың соңына дейін ТМК-ны дамыту Стратегиясын Тұжырымдама түрінде және пилот ретінде Бизнестің цифрлық картасына түйінді нысаналы индикаторларды, ТОП проблемалар мен инвестициялық жобаларды ұсыну қажеттігін жеткізді.

Баталовтың айтуынша, құжат тарифтік саясатты үндестіруге, реттеудің болжамдылығын қамтамасыз етуге және геология мен терең өңдеу бойынша басымдықтарды айқындауға, ашық және болжамды іскерлік ортаны құруға мүмкіндік береді.

Кездесу барысында салалық бизнес өкілдерінің баяндамалары да тыңдалды. Атап айтқанда, ферроқорытпа зауытының директоры Хондамир Юлдашев отырысқа қатысушылардың назарын электр энергиясы мен көлік қызметтеріне арналған тарифтерге аударды.

Сонымен қатар, теміржол тарифтері мен локомотивтік тарту қызметтері мәселесі қозғалды. «Қазақмыс» корпорациясының Басқарма төрағасы Нұрахмет Нұриев локомотивтік тартым қызметтерінің тарифтерін мемлекеттік реттеуді сақтауды жақтады.