Қаржы министрі бюджет қаражатын игермеген министрліктер мен өңірлерді атады
Республикалық бюджеттің 28 млрд теңгесі игерілмей қалған
Қаржы министрі Ерұлан Жамаубаев Үкімет отырысында Цифрлық даму, инновациялар және аэроғарыш өнеркәсібі министрлігі, Экология, геология және табиғи ресурстар министрлігі, Жоғарғы Сот, Қаржы және Білім және ғылым министрліктері ірі сомадағы бюджет қаражатын игермегенін мәлім етті.
«Мемлекеттік бюджеттің шығыстары 98,8%, республикалық бюджеттің шығыстары - 99,5%, жергілікті бюджеттердің шығыстары 98,4% атқарылды. Республикалық бюджеттің шығыстары 9 трлн 251 млрд теңгені құрады. 45 млрд теңге атқарылмаған. Оның ішінде 17 млрд теңге үнемделіп, 28 млрд теңге игерілмеген», - деді министр.
Министрдің айтуынша, қаражат игерілмеуінің бірнеше себептері бар.
«Қаражат игерілмеуінің негізгі себептері: конкурстық рәсімдер мен шарт жасасуды ұзаққа созу және уақытылы өткізбеу, орындалған жұмыс актілерін ұсынбау, карантиндік шектеулерге байланысты тауарларды жеткізбеу, нақты көрсетілген қызметтер көлемі, орындалған жұмыстар үшін ақы төлеу және республикалық бюджеттің қолма-қол ақшаны бақылау шотындағы қаражаттың жеткіліксіздігі», - деп атап өтті Е. Жамаубаев.
Айжан Қалиева, Нұр-Сұлтан
