Нетаньяхудың ұлын қауіпсіздігіне төнген қатерге байланысты АҚШ-тан шұғыл алып кетті

Яир Нетаньяху Майамиден шұғыл кетіп, күзетшілердің сүйемелдеуімен Израильге оралды, деп хабарлайды Azattyq Rýhy  Bild-ке сілтеме жасап.

Израиль премьер-министрі Биньямин Нетаньяхудың ұлы Яир Майамиден шұғыл әкетіліп, Израильге қайтарылды. Бұл туралы Израильдің «Шин Бет» қауіпсіздік қызметі хабарлады.

Арнайы қызмет өкілдері оны елге қайтару туралы шешім қауіпсіздігіне төнген қатер бағаланғаннан кейін қабылданғанын растады.

«Шынымен де елеулі қауіп болды. Жағдайды бағалағаннан кейін оны күзет тобымен бірге Израильге шұғыл қайтару туралы шешім қабылданды», – делінген арнайы қызмет мәлімдемесінде.

Алайда «Шин Бет» қауіптің нақты сипатын ашып айтпады және оның Иранмен байланысты болғанын растаған жоқ.

Newsmax телеарнасы АҚШ-тың құқық қорғау органдарындағы дереккөзіне сілтеме жасап, Яир Нетаньяху өткен жылдың соңында-ақ Иран ұйымдастырды деген болжам бар қастандық жоспарының нысанасына айналуы мүмкін болғанын хабарлады. Телеарна мәліметінше, Иран агенттері болуы мүмкін деген адамдар Майамиде жүріп, оның үйі мен жүріп-тұруын бақылаған.

Осыдан кейін, айтылған мәліметке сәйкес, кіші Нетаньяхуға АҚШ-тан дереу кету бұйырылған. Ол жеке заттарын қалдырып кеткен деген ақпарат бар.

Бұған дейін Биньямин Нетаньяху Иран оның ұлдарының бірін өлтіруге әрекет жасағанын мәлімдеген. Алайда Израиль премьер-министрі нақты қай ұлы туралы айтып отырғанын нақтыламаған.

Осы аптада Иранның Жоғары ұлттық қауіпсіздік кеңесінің хатшысы Мохсен Резайи Израиль премьер-министрінің атына тікелей қоқан-лоқы айтты.

«Біз сионистік режимнің премьер-министрі Биньямин Нетаньяхуды тозаққа жібереміз», – деді ол.