Шымкент әкімдігі кәсіпкерлердің жерін заңсыз тартып алған
Бизнесмендер өз кәсібіне 600 млн теңге қаражат салған
Шымкент әкімдігі бірнеше кәсіпкердің жерін заңсыз тартып алғаны анықталды, деп хабарлайды Azattyq Rýhy.
Антикордың ұсынысы бойынша Шымкент қаласының «Құрсай» жаңа құрылыс нарығы үлескерлерінің құқықтары қорғалды.
Сыбайлас жемқорлыққа қарсы қызмет үшін бизнесті шенеуніктердің заңсыз араласуынан қорғау басым міндет және Агенттіктің тұрақты бақылауында.
«Қабылданған шаралардың арқасында «Бизнеске жол» жобасы аясында өз бизнесін ашуды жоспарлаған кәсіпкерлерден жер учаскелерін негізсіз алып қоюдың алдын алуға мүмкіндік туды.
Мәселен, Шымкент қаласында 5 кәсіпкер мемлекет қажеттілігі үшін жерлерін негізсіз алып қою мәелесімен Антикорға жүгінді. Олар құрылыс материалдары нарығына аумақтарды абаттандыруға 600 млн теңгеден астам қаражат салып, алайда оларды алып қою туралы уақтылы хабарлама алмаған. Бұл ретте әкімдік 2024 жылдың шілдесінде аталған учаскелерді өтеусіз алып қою туралы шешім қабылдаған.
Антикордың ұсынысы бойынша жерді алып қою тоқтатылып, әкімдік сотқа талаптардан бас тарту туралы өтініш берді», - делінген хабарламада.
